Concienciación sobre o dano cerebral, prevención das súas causas a través de hábitos saudables e sensibilización sobre as nosas iniciativas solidarias van pola man coas actividades deportivas #PoloDanoCerebral. O 30 de xuño vai ter lugar en Lalín a 3ª Carreira e Andaina Solidaria Camiñando Polo Dano Cerebral; conta con diferentes modalidades de inscrición: 10K, 5K, andaina de 7K e carreiras escolares. Inscrición aquí. O sábado 6 de xullo levaremos a 2ª Travesía a Nado Polo Dano Cerebral á praia do Preguntoiro, en Vilaxoán, Vilagarcía de Arousa. É unha proba deportiva non competitiva e aberta a persoas nadadoras con e sen discapacidade que coas modalidades de 900 e 1.800 m. Inscrición aquí.
ADACECO levou a iniciativa 'Ponte no meu lugar' ao CEIP Alborada no mes de abril. Durante esta actividade o estudantado puido poñerse no lugar das persoas con dano cerebral, experimentando uns intres a súa vida cotiá.
ADACE Lugo
Do 3 ao 12 de maio ADACE Lugo celebrou un torneo solidario de pádel grazas á colaboración co club Terra Padel, de Lugo. As persoas usuarias da asociacion elaboraron un pack de benvida con bolsas que pintaron á man.
Alento
A Memoria 2023 de Alento foi aprobada na Asemblea Xeral Ordinaria de socios e socias, celebrada o 4 de maio de 2024. Un percorrido polo traballo de Información e asesoramento, EscuelaDCA, Centro de Día e Centro Residencial.
DCA Ourense
DCA Ourense promoveu a creación duns xogos tradicionais de madeira, coa particularidade de que as propias persoas con dano cerebral da asociación traballaron a madeira para deseñar e crear estes obxectos.
Sarela
Sarela participa no proxecto europeo EUTERPE_adn, que ten como obxectivo principal explorar o impacto terapéutico da música en persoas maiores, con deterioro cognitivo ou con dano cerebral adquirido.
O vindeiro 20 de xuño, Sarela e FEDACE organizan en Santiago unha xornada sobre inclusión sociolaboral de colectivos con dificultades de inserción: 'Trazando Camiños. Oportunidades e aprendizaxes arredor da orientación laboral especializada en persoas con dano cerebral adquirido'. Inscrición aquí.
FEGADACE ten o pracer de anunciar que ten unha nova páxina web, máis amable, útil e accesible. Esta mudanza é, ademais, o primeiro paso no camiño cara a adopción da nova marca de todo o movemento asociativo a nivel estatal. Este fito suporá un cambio de denominación, coa substitución de FEGADACE por Dano Cerebral Galicia.
Federación Galega de Dano Cerebral (FEGADACE)
Rúa Galeras, 17, 2º, oficina 5 - 15705 Santiago de Compostela
